ടൈംസ് സ്‌ക്വയറിലെ ബില്‍ബോര്‍ഡില്‍ എത്തുന്ന ആദ്യ തമിഴ് താരമായി വിജയ്
പ്രിയ താരം വിജയ്‌യുടെ ജന്മദിനം ആഘോഷമാക്കാന്‍ ആരാധകര്‍. കാനഡയിലുള്ള വിജയ് ആരാധകര്‍ തങ്ങളുടെ ഇഷ്ട താരത്തിന്റെ ചിത്രം ന്യൂ യോര്‍ക്കിലെ ടൈംസ് സ്‌ക്വയറില്‍ എത്തിച്ചിരിക്കുകയാണ്. ജൂണ്‍ 22-ാം തീയതി 49-ാം പിറന്നാളാണ് വിജയ് ആഘോഷിക്കാനൊരുങ്ങുന്നത്.
പിറന്നാള്‍ ആഘോഷത്തിന് മുന്നോടിയായാണ് വിജയ് ചിത്രത്തിലെ സ്റ്റില്ലുകളും ക്ലിപ്പുകളും കോര്‍ത്തിണക്കി ഇങ്ങനെയൊരു ദൃശ്യ വിരുന്ന് ആരാധകര്‍ ഒരുക്കിയിരിക്കുന്നത്. കാനഡയിലെ വിജയ് മക്കള്‍ ഇയക്കത്തിന്റെ ഭാഗമാണ് ആരാധകര്‍. ‘മാസ്റ്റേഴ്‌സ്’ ചിത്രത്തിലെ ഗാനത്തിനൊപ്പം ടൈംസ് സ്‌ക്വയറില്‍ നിന്ന് നൃത്തം ചെയ്യുന്ന വീഡിയോയും പലരും പങ്കുവയ്ക്കുന്നുണ്ട്.
”ടൈംസ് സ്‌ക്വയറിലെ ബില്‍ബോര്‍ഡില്‍ വിജയ് അണ്ണനെ കാണാന്‍ പറ്റിയതില്‍ ഒരുപാട് സന്തോഷവും അഭിമാനവും തോന്നുന്നു. പിറന്നാള്‍ ആഘോഷങ്ങള്‍ ഇവിടെ ആരംഭിക്കുകയാണ്” എന്നാണ് ഒരു ആരാധകന്‍ കുറിച്ചത്. ടൈംസ് സ്‌ക്വയറിലെ ബില്‍ബോര്‍ഡിലെത്തിയ ആദ്യ തമിഴ് താരമാണ് വിജയ്.
അതേസമയം, ചെന്നൈയില്‍ ലോകേഷ് കരകരജ് ചിത്രം ‘ലിയോ’യുടെ ഷൂട്ടിംഗ് തിരക്കുകളിലാണ് വിജയ് ഇപ്പോള്‍. ചിത്രത്തില്‍ വിജയ് ആലപിക്കുന്ന ഗാനം താരത്തിന്റെ പിറന്നാള്‍ ദിവസം റിലീസ് ചെയ്യും. ലോകേഷ് സിനിമാറ്റിക് യൂണിവേഴ്‌സിലെ മറ്റൊരു ചിത്രമാകും ലിയോ എന്നൊരു ഹൈപ്പ് ചിത്രത്തിന് തുടക്കം മുതലേ ലഭിച്ചിരുന്നു.
അതുകൊണ്ട് തന്നെ ഏറെ പ്രതീക്ഷയോടെയാണ് ലിയോക്കായി ആരാധകര്‍ കാത്തിരിക്കുന്നത്. സിനിമകള്‍ മാത്രമല്ല, വിജയ്‌യുടെ രാഷ്ട്രീയ പ്രവേശനവും ഇപ്പോള്‍ ചര്‍ച്ചകളില്‍ നിറയുന്നുണ്ട്. തമിഴ്‌നാട്ടിലെ എല്ലാ നിയോജകമണ്ഡലങ്ങളില്‍ നിന്നും പത്ത്, പന്ത്രണ്ട് ക്ലാസ്സുകളില്‍ ഉന്നത വിജയം നേടിയ വിദ്യാര്‍ത്ഥികളെ ആദരിക്കാനായി വിജയ് ഒരു പരിപാടി സംഘടിപ്പിച്ചിരുന്നു.
ഇത് താരത്തിന്റെ രാഷ്ട്രീയ പ്രവേശനത്തിന്റെ തുടക്കമാണ് എന്നാണ് പലരും നോക്കിക്കാണുന്നത്. പരിപാടിയില്‍ വോട്ട് ചെയ്യുന്നതിനെ കുറിച്ചും വിജയ് സംസാരിച്ചിരുന്നു. പണം വാങ്ങി വോട്ട് ചെയ്യുന്നത് സ്വന്തം കണ്ണില്‍ വിരല്‍ കൊണ്ട് കുത്തുന്നത് പോലെയാണ് എന്നായിരുന്നു വിജയ് പറഞ്ഞത്.