അശ്വിൻ കാരണം ഇപ്പോൾ ഐപിഎൽ പോലെ തന്നെ തമിഴ്‌നാട് പ്രീമിയർ ലീഗിനെ ലോകം അറിയുന്നു, അയാൾ തന്ത്രങ്ങളുടെ രാജാവാണ്; അശ്വിനെ പുകഴ്ത്തി ആകാശ് ചോപ്ര

ഒരു ഡിആർഎസ് കോൾ അവലോകനം ചെയ്യാനുള്ള ആർ അശ്വിന്റെ തീരുമാനം തമിഴ്‌നാട് പ്രീമിയർ ലീഗിനെ (ടിഎൻപിഎൽ) ആഗോള ശ്രദ്ധയിൽപ്പെടുത്തിയെന്ന് ആകാശ് ചോപ്ര എടുത്തുപറഞ്ഞു. കഴിഞ്ഞ ദിവസം നടന്ന ലീഗിലെ തങ്ങളുടെ ആദ്യ മത്സരത്തിൽ അശ്വിൻ ഡി.ആർ.എസിൽ നോട്ടൗട്ട് എന്ന് തെളിഞ്ഞ പന്ത് റിവ്യൂ എടുത്തിരുന്നു.

തമിഴ്‌നാട് പ്രീമിയർ ലീഗ് 2023-ലെ നാലാം മത്സരം ഡിണ്ടിഗൽ ഡ്രാഗൺസും Ba11sy ട്രിച്ചിയും തമ്മിൽ ഏറ്റുമുട്ടിയപ്പോൾ ക്രിക്കറ്റ് പിച്ചിൽ അപൂർവങ്ങളിൽ അപൂർവമായ സംഭവങ്ങൾ കണ്ടു. കാരണം ബാറ്ററും ബൗളറും ഒരേ പന്തിൽ തന്നെ തങ്ങൾക്ക് അനുകൂലമായ തീരുമാനം ഉണ്ടാകാൻ റിവ്യൂ എടുത്തു. ട്രിച്ചിയുടെ ബാറ്റിംഗിനിടെയാണ് സംഭവം. ഡ്രാഗൺസിന്റെ നായകൻ രവിചന്ദ്രൻ അശ്വിൻ എറിഞ്ഞ 13-ാം ഓവറിലെ അഞ്ചാം പന്തിൽ, ട്രിച്ചിയുടെ ആർ രാജ്‌കുമാറിന്റെ ക്യാച്ച് കീപ്പർ കൈപ്പിടിയിൽ ഒതുക്കി. ഓൺഫീൽഡ് അമ്പയർ ക്ഷണനേരം കൊണ്ട് തന്നെ ഔട്ട് വിധിച്ചു.

തീരുമാനത്തിൽ അതൃപ്തി, ബാറ്റർ ഉടൻ തീരുമാനം റിവ്യൂ ചെയ്തു. എന്നാൽ പന്ത് ബാറ്റിൽ കൊള്ളുമ്പോൾ ബാറ്റിന്റെ ഒരു ഭാഗം നിലത്ത് പതിച്ചു എന്നത് വ്യക്തമായി. എന്നിരുന്നാലും, മൂന്നാം അമ്പയർ ബാറ്റിനും പന്തിനും ഇടയിൽ വ്യക്തമായ വിടവ് കണ്ടെത്തി, അതിനാൽ ‘നോട്ടൗട്ട്’ എന്ന വിധി വന്നു. എന്നാൽ, ഓൺ ഫീൽഡ് അമ്പയർ തീരുമാനം മാറ്റി നോട്ടൗട്ടെന്ന് സൂചന നൽകിയതോടെ അശ്വിൻ വീണ്ടും റിവ്യൂവിന് പോയി. മൂന്നാം അമ്പയർ വീണ്ടും മുഴുവൻ പ്രക്രിയയിലൂടെയും കടന്ന് പോയി, ഒരു എഡ്ജ് കണ്ടെത്താനാകാത്തതിനാൽ തീരുമാനം നിലനിന്നു.

തന്റെ യൂട്യൂബ് ചാനലിൽ പങ്കിട്ട ഒരു വീഡിയോയിൽ സംഭവത്തെക്കുറിച്ച് പ്രതിഫലിപ്പിക്കുമ്പോൾ, ആർ അശ്വിന്റെ നീക്കം ടിഎൻപിഎല്ലിനെ ആഗോള ശ്രദ്ധയാകർഷിക്കാൻ സഹായിച്ചതായി ചോപ്ര നിരീക്ഷിച്ചു:

“അശ്വിൻ ലീഗിനെ ലോകത്തിന് മുന്നിൽ അറിയിച്ചു. അശ്വിനും എല്ലാവരും സന്തുഷ്ടരായിരുന്നു, പക്ഷേ ബാറ്റർ ഒരു റിവ്യൂ ആവശ്യപ്പെട്ടു. തേർഡ് അമ്പയർ വളരെ മികച്ച രീതിയിൽ തീരുമാനത്തിൽ ഉറച്ചു നിന്നു. അദ്ദേഹം പ്രോട്ടോക്കോൾ പാലിച്ചു, എല്ലാ ആംഗിളുകളും പരിശോധിച്ചു, തന്റെ തീരുമാനം ശരി ആണെന്ന് അദ്ദേഹം ഉറപ്പിച്ചു.” ചോപ്ര പറഞ്ഞു.മത്സരത്തിൽ ടീം 6 വിക്കറ്റിന് ജയിച്ചപ്പോൾ അശ്വിൻ 2 വിക്കറ്റുകൾ വീഴ്ത്തി.