തുലാവർഷക്കാറ്റ് വീണ്ടും സജീവമാകുന്നതിനാൽ സംസ്ഥാനത്ത് ശക്തമായ മഴയ്ക്ക് സാധ്യത.

തിരുവനന്തപുരം: തുലാവർഷക്കാറ്റ് വീണ്ടും സജീവമാകുന്നതിനാൽ സംസ്ഥാനത്ത് ശക്തമായ മഴയ്ക്ക് സാധ്യത. ബംഗാൾ ഉൾക്കടലിൽ രൂപപ്പെട്ട ദന ചുഴലിക്കാറ്റിനും അറബിക്കടലിലെ കേരള തീരത്തെ ചക്രവാതചുഴിക്ക്‌ ശേഷം ദുർബലമായ തുലാവർഷ കാറ്റ് (കിഴക്കൻ / വടക്ക് കിഴക്കൻ കാറ്റ് ) വരും ദിവസങ്ങളിൽ കേരളം ഉൾപ്പെടെയുള്ള തെക്കേ ഇന്ത്യയിൽ പതിയെസജീവമാകാൻ സാധ്യത. ഇടി മിന്നലോടു കൂടിയ കിഴക്കൻ മഴ ഇനിയുള്ള ദിവസങ്ങളിൽ പ്രതീക്ഷിക്കാം

വളരെ കുറഞ്ഞ സമയത്തു പെട്ടെന്നുള്ള ശക്തമായ മഴയ്ക്കാണ് സാധ്യത. മലയോര മേഖലയിൽ കൂടുതൽ മഴയ്ക്ക് സാധ്യതയുണ്ടെന്നാണ് അറിയിപ്പ്. ഉച്ചക്ക് ശേഷം വൈകുന്നേരത്തോടെയാണ് കൂടുതൽ മഴയ്ക്ക് സാധ്യത. മലയോര മേഖലയിൽ പ്രത്യേക ജാഗ്രത. വെള്ളിയാഴ്ച രാവിലെ തിരുവനന്തപുരം, തൃശൂർ, കോഴിക്കോട്, വയനാട് ജില്ലകളിൽ ഒറ്റപ്പെട്ടയിടങ്ങളിൽ ഇടിമിന്നലോടു കൂടിയ ഇടത്തരം മഴയ്ക്കും മണിക്കൂറിൽ 40 കിലോമീറ്റർ വരെ വേഗതയിൽ ശക്തമായ കാറ്റിനുമാണ് സാധ്യത