നീണ്ടനാളത്തെ ഇടവേളയ്ക്ക് ശേഷം മിനിസ്‌ക്രീനിലൂടെ ശക്തമായ തിരിച്ചുവരവ് നടത്തുകയാണ് അര്‍ച്ചന കവി.
നീലത്താമരയെന്ന ചിത്രത്തിലൂടെയായി വെള്ളിത്തിരയിലെത്തി പ്രേക്ഷകരുടെ ഇഷ്ടംപിടിച്ചുപറ്റിയ താരമാണ് അര്‍ച്ചന കവി. നീണ്ടനാളത്തെ ഇടവേളയ്ക്ക് ശേഷം മിനിസ്‌ക്രീനിലൂടെ ശക്തമായ തിരിച്ചുവരവ് നടത്തുകയാണ് താരം.
” നീലത്താമരയിലൂടെയുള്ള തുടക്കം ജീവിതത്തില്‍ എനിക്ക് കിട്ടിയ വലിയ ഭാഗ്യമാണ്. ജയപരാജയങ്ങള്‍ ഒരുപാട് കണ്ടിട്ടുണ്ട്. നമ്മുടെ മാനസികാവസ്ഥയെ ബാധിക്കുന്ന തരത്തിലുള്ള പല കാര്യങ്ങളുമുണ്ട്. ഒരു ബ്രേക്ക് കിട്ടിയാല്‍ പൊളിക്കാം എന്ന് എല്ലാവരും പറയാറുണ്ട്. അങ്ങനെയല്ല, അത് നിലനിര്‍ത്തുന്നതാണ് വലിയ വെല്ലുവിളി. ഈ മേഖലയില്‍ ജോലി ചെയ്യുന്നത് ആസ്വദിക്കാനാവുമെങ്കില്‍ തുടരാം. ജയവും പരാജയവുമെല്ലാം അതേ രീതിയില്‍ കാണാന്‍ സാധിക്കണം.
കല്യാണം കഴിഞ്ഞ് അബീഷിനൊപ്പം മുംബൈയില്‍ താമസിച്ചിരുന്ന സമയത്തായിരുന്നു വീഡിയോകള്‍ ചെയ്ത് തുടങ്ങിയത്. അഭിനേത്രിയാവുമ്പോള്‍ നമ്മളെന്താണ് ചെയ്യേണ്ടത് എന്നതിനെക്കുറിച്ച് സ്‌ക്രിപ്റ്റുണ്ടാവും, അത് ചെയ്താല്‍ മതി. അങ്ങനെയല്ല, നീ സ്വന്തമായുണ്ടാക്കൂ. ട്രൈ ചെയ്ത് നോക്കൂയെന്നായിരുന്നു അബീഷ് പറഞ്ഞത്. എന്താണ് ചെയ്യേണ്ടതെന്ന് എനിക്കറിയില്ലായിരുന്നു. നമ്മള്‍ ചെയ്യുന്നത് കണ്ട് ആളുകള്‍ നമ്മെ സ്വീകരിച്ചാല്‍ അത് വിജയമാണ്. യൂട്യൂബിലേക്ക് നമ്മള്‍ നമ്മളായിത്തന്നെയാണ് വരുന്നത്. ആ സമയത്ത് താരങ്ങളാരും യൂട്യൂബ് ചാനലിലുണ്ടായിരുന്നില്ല. ഇപ്പോ എല്ലാവരും ചെയ്യുന്ന കാര്യമായി മാറിയിരിക്കുകയാണത്. സിനിമയില്‍ വിജയിക്കണമെങ്കില്‍ ചാനല്‍ വേണമോ എന്ന് ചോദിച്ച് അബീഷ് അന്ന് എന്നെ കളിയാക്കുമായിരുന്നു.
ആദ്യം മടിച്ചെങ്കിലും പിന്നീട് ഞാനും അത് ആസ്വദിച്ച് തുടങ്ങുകയായിരുന്നു. അങ്ങനെയാണ് അച്ഛനൊപ്പം വര്‍ക്ക് ചെയ്തത്. നമുക്കിത് ചെയ്യാമെന്ന് പറഞ്ഞ് അച്ഛനെ വിളിച്ചിരുന്നു. അഭിനയിക്കാനറിയില്ലെങ്കില്‍ അപ്പോള്‍ത്തന്നെ പിരിച്ച് വിട്ടോളൂ എന്ന് പ്രൊഡക്ഷന്‍ ടീമിനോട് ഞാന്‍ പറഞ്ഞിരുന്നു. അത് ഷൂട്ട് ചെയ്ത് കണ്ടുകഴിഞ്ഞപ്പോഴാണ് എന്നെക്കൊണ്ട് പറ്റുമെന്ന് മനസിലാക്കിയത്. മീനവിയലിന് സ്‌പോണ്‍സര്‍ഷിപ്പ് കിട്ടുമെന്നൊന്നും വിചാരിച്ചില്ല. ഇങ്ങനെയൊരു പ്ലാനെുണ്ടെന്ന് പറഞ്ഞപ്പോള്‍ അവരും അംഗീകരിക്കുകയായിരുന്നു. ഇവിടെ ഇങ്ങനെയുള്ള ചോദ്യങ്ങളൊക്കെ ചോദിക്കുമ്പോള്‍ മറ്റുള്ളവരെന്ത് വിചാരിക്കുമെന്നൊക്കെയാണ് കരുതുന്നത്.
അബീഷും ഞാനും ചെറുപ്പം മുതലേ അറിയാവുന്നവരാണ്. ഞങ്ങളൊന്നിച്ച് ജോലി ചെയ്തിട്ടുണ്ട്. ആങ്കറിങ് ചെയ്തിരുന്ന സമയത്ത് ഇതൊന്ന് ശരിയാക്കിത്താടോ എന്നൊക്കെ പറയുമായിരുന്നു. കാര്യങ്ങളെക്കുറിച്ചെല്ലാം സംസാരിക്കുന്നവരാണ് ഞങ്ങള്‍. അങ്ങോട്ടും ഇങ്ങോട്ടും നന്നായി അറിയാമെന്നായിരുന്നു ഞങ്ങള്‍ കരുതിയത്. വിവാഹത്തെക്കുറിച്ചുള്ള ഞങ്ങളുടെ കാഴ്ചപ്പാടുകള്‍ തികച്ചും വ്യത്യസ്തമായിരുന്നു. ഞങ്ങളുടെ ആവശ്യങ്ങളിലും സമാനതകളുണ്ടായിരുന്നില്ല. ഞങ്ങളുടെ സൗഹൃദം ഞങ്ങള്‍ക്ക് ഏറെ പ്രധാനപ്പെട്ട കാര്യമായിരുന്നു. അന്യോന്യം കാണാന്‍ പോലും പറ്റാത്ത അവസ്ഥ വരരുതെന്നാഗ്രഹിച്ചിരുന്നു.
ഞാന്‍ അച്ഛനും അമ്മയുമായി എല്ലാ കാര്യങ്ങളും പങ്കുവെക്കുന്നയാളാണ്. ഇമോഷണലായൊരു പ്രശ്‌നം വന്നാല്‍ അത് എങ്ങനെ നേരിടണമെന്ന് അറിയാത്ത ആളാണ് അബീഷ്. വിവാഹം എന്ന ചിന്ത തന്നെ ഇപ്പോള്‍ എന്നെ ഭയപ്പെടുത്തുന്നതാണ്. അച്ചനാവാന്‍ പോവുന്നത് എന്തോ ഒരു ഉള്‍വിളി കൊണ്ടാണെന്ന് പറയാറില്ലേ, അത് എല്ലാവര്‍ക്കും ഉണ്ടാവാറില്ലല്ലോ, അതുപോലെയാണ് വിവാഹവും. എല്ലാവര്‍ക്കും അത് പറ്റിയെന്ന് വരില്ല. ഞങ്ങളുടെ ചുറ്റിലും ഒത്തി സന്തോഷത്തോടെ ജീവിക്കുന്ന ദമ്പതികളെ കണ്ടിട്ടുണ്ട്.” അര്‍ച്ചന കവി പറഞ്ഞു.