മരടിലെ ഗാന്ധി സ്‌ക്വയറിന് സമീപം കോണ്‍ക്രീറ്റ് സ്ലാബ് തകര്‍ന്നുവീണ് രണ്ടു തൊഴിലാളികള്‍ മരിച്ചു.
കൊച്ചി: മരടിലെ ഗാന്ധി സ്‌ക്വയറിന് സമീപം കെട്ടിടം പൊളിക്കുന്നതിനിടെ കോണ്‍ക്രീറ്റ് സ്ലാബ് തകര്‍ന്നുവീണ് രണ്ടു തൊഴിലാളികള്‍ മരിച്ചു. ഒഡീഷ സ്വദേശികളായ സുശാന്ത് (35), ശങ്കര്‍ (25) എന്നിവരാണ് മരിച്ചത്. കെട്ടിടത്തിന്റെ സ്ലാബ് ഇടിഞ്ഞുവീണ് ഇവരുടെ ദേഹത്തേക്ക് പതിക്കുകയായിരുന്നു.
ബുധനാഴ്ച രാവിലെ പതിനൊന്ന് മണിയോടെയാണ് അപകടം. അഞ്ച് തൊഴിലാളികളായിരുന്നു ജോലിക്കുണ്ടായിരുന്നത്. പൊളിക്കുന്നതിനിടെ പെട്ടെന്ന് സ്ലാബ് തകര്‍ന്നുവീണപ്പോള്‍ രണ്ട് തൊഴിലാളികള്‍ ഇതിനടിയില്‍ കുടുങ്ങുകയായിരുന്നു. ഉടന്‍തന്നെ നാട്ടുകാരും ഫയര്‍ഫോഴ്‌സും ചേര്‍ന്ന് ഇവരെ പുറത്തെടുത്ത് ആശുപത്രിയിലെത്തിച്ചെങ്കിലും ജീവന്‍ രക്ഷിക്കാനായില്ല.